बंगलादेश फर्कने प्रक्रियामा सेख हसिना

काठमाडौँ- भारतमा स्वनिर्वासनमा रहेकी बंगलादेशकी पूर्वप्रधानमन्त्री सेख हसिनाले स्वदेश फर्किन नयाँ राहदानी र राष्ट्रिय परिचयपत्र (एनआईडी) उपलब्ध गराउन सोमबार अनुरोध गरेकी छन्। सन् २०२४ मा बंगलादेश छाडेर भागेपछि उनले पहिलोपटक यस्तो औपचारिक पहल गरेको अन्तरराष्ट्रिय सञ्चारमाध्यमले जनाएका छन्।

हसिनाको यो अनुरोधले आगामी डिसेम्बरमा बंगलादेश फर्किने उनको योजनालाई कार्यान्वयन गर्ने दिशामा अहिलेसम्मकै स्पष्ट कदमका रूपमा लिइएको छ। दुई वर्षभन्दा बढी समयअघि भएको हिंसात्मक जनविद्रोहले उनको लामो शासन अन्त्य गरेको थियो। उनी फर्किने तयारीले प्रतिबन्धित अवस्थामा रहेको उनको दलसँग जोडिएको मुलुकको राजनीतिक र कानुनी तनाव फेरि चर्किने सम्भावना बढाएको छ।