जुवाखालमा छापा मार्न आफैँ पुगे डीआईजी

कर्णाली प्रदेशको राजधानी सुर्खेतको वीरेन्द्रनगरमा जुवातास खेल्नेविरुद्ध प्रहरीले आइतबार (कात्तिक २२) रातभर विशेष ‘अपरेसन’ सञ्चालन गरेको छ । त्यसक्रममा कर्णाली प्रदेश प्रहरी कार्यालयका प्रमुख एवं डीआईजी जयराज सापकोटा आफैँ फिल्डमा खटिए ।

प्रदेश र जिल्ला प्रहरी कार्यालय सुर्खेतको संयुक्त टोलीले अपरेसनका क्रममा वीरेन्द्रनगरका चार स्थानमा छापा मारेर जुवातास खेलिरहेका ३५ जनालाई नियन्त्रणमा लिएको छ । उनीहरूका साथबाट नगद कुल नौ लाख ६६ हजार १३६ रुपैयाँ बरामद समेत गरिएको प्रहरीले जनाएको छ ।