डीडीसीको बटर कारोबारमा ५ करोडको क्षति आशंका, सुजल डेरीमाथि सीआईबीको अनुसन्धान

काठमाडौं – दुग्ध विकास संस्थान (डीडीसी) मा भएको भनिएको करोडौँ रुपैयाँको आर्थिक अनियमितता प्रकरणमा नेपाल प्रहरीको केन्द्रीय अनुसन्धान ब्युरो (सीआईबी) ले अनुसन्धान तीव्र पारेको छ । संस्थानबाट बजार मूल्यभन्दा कम मूल्यमा ५० टन बटर खरिद गरेको विषयमा नेपाल उद्योग वाणिज्य महासंघका अध्यक्ष अञ्जन श्रेष्ठ सम्बद्ध सुजल डेरीमाथि पनि अनुसन्धान भइरहेको छ ।

अनुसन्धान स्रोतका अनुसार डीडीसीबाट सुजल डेरीले खरिद गरेको बटरको मूल्य र बजारमा प्रचलित मूल्यबीच ठूलो अन्तर देखिएको छ । उक्त कारोबारबाट संस्थानलाई करिब ५ करोड रुपैयाँ आर्थिक नोक्सानी भएको हुन सक्ने आशंका गरिएको छ । सार्वजनिक संस्थानको सम्पत्ति बजार मूल्यभन्दा निकै कममा बिक्री भएको हो भने त्यसको जिम्मेवारी कसले लिने भन्ने प्रश्न पनि यस प्रकरणसँगै उठेको छ ।