७२ हजार घुस लिने तत्कालीन प्रमुख प्रशासकीय अधिकृतलाई ६ महिना कैद

काठमाडौं । सडक ढलान योजनाको भुक्तानी दिने क्रममा ७२ हजार रुपैयाँ घुस लिएको अभियोगमा महोत्तरीको सोनमा गाउँपालिकाका तत्कालीन प्रमुख प्रशासकीय अधिकृत श्रीदेव यादवलाई विशेष अदालतले ६ महिना कैद सजाय सुनाएको छ।

विशेष अदालतले बिहीबार सुनाएको फैसलाअनुसार यादवलाई ६ महिना कैदसँगै ७२ हजार रुपैयाँ जरिवाना गर्ने निर्णय गरेको छ। साथै, पीडित राहत कोषमा २ हजार २८० रुपैयाँ जम्मा गर्नसमेत आदेश दिएको छ। विशेष अदालतका न्यायाधीशहरू वासुदेव आचार्य, डिल्लीरत्न श्रेष्ठ र विदुर कोइरालाको इजलासले उक्त फैसला गरेको हो।