तीन महिनामै पौने १२ करोडको तास आयात, सरकारले उठायो ७ करोडभन्दा बढी राजस्व

काठमाडौं – चालु आर्थिक वर्ष २०८३/८४ को पहिलो तीन महिनामा नेपालमा ११ करोड ६८ लाख रुपैयाँभन्दा बढीको तास आयात भएको छ। भन्सार विभागको तथ्याङ्कअनुसार दसैँ–तिहारलाई लक्षित गर्दै साउनदेखि असोजसम्म ३४ लाख २२ हजार ६६१ बट्टा तास नेपाल भित्रिएको हो । उक्त परिमाणको तास आयात गर्दा सरकारले भन्सार राजस्वबापत मात्रै ७ करोड ७ लाख ७४ हजार रुपैयाँ सङ्कलन गरेको छ। आयातित तासको कुल मूल्यको तुलनामा यो राजस्व करिब ६० प्रतिशत हो ।

तास आयातबाट सरकारले उल्लेख्य राजस्व सङ्कलन गरिरहँदा यसको प्रयोग र कानुनी व्यवस्थाबीचको विरोधाभास पनि देखिएको छ। एकातिर प्रहरीले गाउँदेखि सहरसम्म जुवातास खेल्नेहरूमाथि कार बाही गर्दै आएको छ भने अर्कोतिर भन्सार नाकाबाट लाखौँ बट्टा तास आयात भइरहेको छ ।