पहिरोको जोखिममा छेडेदह ताल, जग्गा विवादले रोकियो संरक्षण

काठमाडौं – बाजुराको खप्तड छेडेदह गाउँपालिकामा रहेको प्रसिद्ध छेडेदह ताल संरक्षणको अभावमा सङ्कटमा पर्दै गएको छ । स्थानीयले ‘प्रेम ताल’ समेत भन्ने गरेको यो तालमा पहिरोको जोखिम बढ्दै गए पनि जग्गा विवादका कारण संरक्षण तथा व्यवस्थापनका काम अघि बढ्न सकेका छैनन् ।

डाँडाकाँडा, शान्त वातावरण र मनमोहक प्राकृतिक दृश्यले घेरिएको छेडेदह ताल आन्तरिक पर्यटकका लागि आकर्षक गन्तव्य हो। धार्मिक तथा पर्यटकीय महत्त्व बोकेको यो ताल खप्तड छेडेदह गाउँपालिका–४ र ७ को बीचमा अवस्थित छ। प्रसिद्ध धार्मिक तथा पर्यटकीय क्षेत्र खप्तड र यही तालको नामबाट गाउँपालिकाको नामकरण गरिएको हो ।