पहिरोको जोखिममा छेडेदह ताल, जग्गा विवादले संरक्षण रोकियो

बाजुराको खप्तड छेडेदह गाउँपालिकामा रहेको छेडेदह ताल पहिरोको जोखिममा परेको छ। तालको संरक्षण र पहिरो नियन्त्रणका लागि काम गर्नुपर्ने भए पनि स्थानीयबीचको जग्गा विवादका कारण संरक्षणका काम अघि बढ्न सकेका छैनन्।

स्थानीयले प्रेम तालसमेत भन्ने गरेको यो ताल खप्तड छेडेदह गाउँपालिका–४ र ७ को बीचमा पर्छ। प्राकृतिक सुन्दरता र धार्मिक महत्त्व बोकेको तालमा बझाङ, अछामलगायत जिल्लाबाट समेत पर्यटक पुग्ने गरेका छन्। तर ताल नजिकै पुगेको पहिरो र संरक्षणको अभावले यसको अस्तित्व नै सङ्कटमा पर्न थालेको छ।