अमेरिकी रक्षा मन्त्री पिट हेगसेथविरुद्ध महाभियोग प्रस्ताव दर्ता

काठमाडौं । अमेरिकी रक्षा मन्त्री पिट हेगसेथ विरुद्ध प्रतिनिधि सभामा महाभियोगको प्रस्ताव पुनः दर्ता गरिएको छ । रिपब्लिकन पार्टीका प्रतिनिधि सभा सदस्य थोमस म्यासीले रक्षा मन्त्री हेगसेथले पदीय अधिकारको दुरुपयोग गर्दै कङ्ग्रेसको अनुमतिविना इरानलगायत अन्य देशहरूमा गैरकानुनी सैन्य कारबाही चलाएको आरोप लगाउँदै महाभियोग प्रस्ताव पेस गरेका हुन् ।

प्रतिनिधि सभाको बैठकलाई सम्बोधन गर्दै सांसद म्यासीले औपचारिक युद्धको घोषणा, वैधानिकता वा राष्ट्रिय संकटको परिस्थिति नरहे पनि रक्षा मन्त्री हेगसेथले गैरकानुनी आदेश जारी गरी विदेशी मुलुकविरुद्ध युद्ध सुरु गराएको दाबी गरे । हेगसेथको कदम संविधान र कानुनको मर्मविपरीत रहेकाले उनलाई पदबाट बर्खास्त गरी भविष्यमा कुनै पनि सार्वजनिक पदका लागि अयोग्य ठहर गर्न महाभियोग चलाउनुपर्ने म्यासीको भनाइ छ ।