प्लेअफमा स्थान सुरक्षित गर्न जनकपुरलाई जित्नैपर्ने दबाब, आज सुदूरपश्चिमसँग भिड्दै

काठमाडौं। नेपाल प्रिमियर लिग (एनपीएल) क्रिकेटमा आज जनकपुर बोल्ट्स र सुदूरपश्चिम रोयल्सबीच प्रतिस्पर्धा हुँदैछ। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा हुने खेल साँझ ५ बजे सुरु हुनेछ।

प्लेअफमा पुग्ने शीर्ष चार टोलीभित्र स्थान सुरक्षित गर्न दुवै टोलीका लागि आजको खेल महत्वपूर्ण छ। पाँच खेल खेलेको सुदूरपश्चिम ६ अंकसहित अंकतालिकाको तेस्रो स्थानमा छ भने समान खेल खेलेको जनकपुर चार अंकसहित पाँचौँ स्थानमा छ। त्यसैले जनकपुरलाई शीर्ष चारको दौडमा कायम रहन जित आवश्यक छ। सुदूरपश्चिम भने जितसँगै आफ्नो स्थान थप बलियो बनाउन चाहन्छ।