तिहारको सुरक्षाका लागि चितवनमा तालिमप्राप्त कुकुर परिचालन

काठमाडौं – तिहारका बेला हुन सक्ने सम्भावित आपराधिक गतिविधि तथा सुरक्षा जोखिमलाई मध्यनजर गर्दै चितवनका भीडभाड हुने स्थान र मुख्य नाकाहरूमा तालिमप्राप्त कुकुर परिचालन गरिएको छ। जिल्ला प्रहरी कार्यालय चितवनले तिहार लक्षित सुरक्षा व्यवस्थाअन्तर्गत विस्फोटक पदार्थ र लागुऔषध पहिचान गर्न सक्ने दुईवटा तालिमप्राप्त कुकुर परिचालन गरेको हो।

जिल्ला प्रहरी कार्यालयका सूचना अधिकारी प्रहरी नायब उपरीक्षक चन्द्रभूषण यादवका अनुसार तिहारका समयमा पटाकाजन्य वस्तुको ओसारपसार हुन सक्ने सम्भावित नाकाहरूमा समेत कुकुर परिचालन गरिएको छ। मानिसको बढी भीडभाड हुने स्थानमा लागुऔषध तथा विस्फोटक पदार्थको ओसारपसार हुन सक्ने जोखिम रहेकाले निगरानी बढाइएको उनले बताए।