ढोरपाटनमा विदेशी सिकारीको चहलपहल, पदयात्रामा रमाउँदै आन्तरिक पर्यटक

काठमाडौं – प्राकृतिक सौन्दर्य, हिमशृङ्खला र फराकिला पाटनका लागि परिचित ढोरपाटनमा यतिबेला आन्तरिक तथा बाह्य पर्यटकको चहलपहल बढेको छ । उच्च पहाडी क्षेत्रमा विदेशी सिकारी नाउर र झारलको सिकारमा व्यस्त छन् भने ढोरपाटन उपत्यका र आसपासका पाटनमा आन्तरिक पर्यटक पदयात्रा तथा प्राकृतिक दृश्यावलोकनमा रमाइरहेका छन् ।

नेपालमा कानुनी रूपमा सिकार खेल्न पाइने एकमात्र क्षेत्र ढोरपाटन सिकार आरक्षमा चालु आर्थिक वर्षको पहिलो सिकार याम सञ्चालन भइरहेको छ । असोजदेखि मङ्सिरसम्म चल्ने यस याममा विदेशी सिकारी नाउर र झारलको सिकारका लागि आरक्षका विभिन्न ब्लकमा पुगेका छन् ।