‘सत्य बाहिर आयो, ममताले न्याय पाइन्’

भर्जिनिया । अमेरिकाको भर्जिनिया राज्यमा पत्नीको शव टुक्राटुक्रा पारेको स्वीकार गरेका नरेश भट्टलाई प्रथम श्रेणीको हत्यामा दोषी ठहर गरिएको छ। पत्नीको मृत्यु आत्महत्याका कारण भएको दाबी गर्दै आएका भट्टको भनाइलाई अस्वीकार गर्दै मङ्गलबार जुरी (न्यायिक समितिका सदस्य) ले उनलाई दोषी ठहर गरेको हो।

गत साता अदालतमा दिएको बयानका क्रममा भट्टले आफूले पत्नीलाई अचेत अवस्थामा फेला पारेको र उनलाई होसमा ल्याउन नसकेपछि आत्तिएर शव टुक्राटुक्रा पारेको तथा त्यसलाई विभिन्न ठाउँमा फालिदिएको बताएका थिए। तर, उनले पत्नी ममता काफ्ले भट्टको हत्या गरेको कुरा भने अस्वीकार गरेका थिए। ममताको शव भने अहिलेसम्म फेला परेको छैन।