नर्स ममता काफ्लेको हत्या गरी शव टुक्राटुक्रा पारेर फाल्ने नरेश भट्ट दोषी ठहर

अमेरिकाको भर्जिनियास्थित अदालतले आफ्नी पत्नी तथा छोरीकी आमा ममता काफ्लेको हत्या गरेको अभियोगमा नरेश भट्टलाई प्रथम श्रेणीको हत्यामा दोषी ठहर गरेको छ। साथै, अदालतले काफ्लेको शव क्षतविक्षत पारेको र लुकाएको अभियोगमा पनि उनलाई दोषी ठहर गरेको छ।

मंगलबार सुनाइएको यो फैसला करिब छ हप्तासम्म चलेको अदालती सुनुवाइ र विभिन्न साक्षीहरूको बयानपछि आएको हो। सुनुवाइका क्रममा स्वयं नरेश भट्टले पनि बयान दिएका थिए। गत साता अप्रत्याशित रूपमा साक्षीका रूपमा उपस्थित हुँदै उनले ममताको शव टुक्राटुक्रा पारेको र फोहोरमा फालेको स्वीकार गरेका थिए।