नहाय–खायसँगै सुरु भयो छठ पर्व, अस्ताउँदो र उदाउँदो सूर्यलाई अर्घ्य दिने तयारी

काठमाडौं – आस्था, श्रद्धा र पवित्रताको पर्व छठको धार्मिक तथा पारम्परिक विधि शुक्रबारदेखि सुरु भएको छ । चार दिनसम्म मनाइने छठ पर्वको पहिलो दिन व्रतालुहरूले स्नान गरी चोखो भोजन ग्रहण गर्ने ‘नहाय–खाय’ विधि सम्पन्न गरेका छन् ।

नहाय–खायका दिन व्रतालुहरूले स्नान गरी शरीर र मन शुद्ध पारेर लौकाको तरकारी र भात खाने परम्परा छ । छठमा लौकालाई पवित्र तरकारीका रूपमा लिइने भएकाले यस दिन बजारमा यसको मागसमेत बढ्ने गर्छ। पर्व नसकिएसम्म व्रतालुहरूले माछामासु तथा अन्य तामसिक भोजन त्याग्ने गर्छन् ।