मुख्य सामग्रीमा जानुहोस्

समाचार

प्रविधि

काटिएका पहाड र पुरिएका सपना पनामा नहरभित्रको रहस्य

newsofnepal.com · Sun Nov 15 16:29:14 UTC 2026

कहिलेकाहीँ मानिसका सपनाहरू प्रकृतिको कठोर सीमाभन्दा धेरै विशाल हुन्छन्, अनि तिनै सपना पूरा गर्न मानव सभ्यताले असम्भव मानिएका पहाडहरू पन्छाउने आँट गर्छ । १९औं शताब्दीको उत्तरार्धतिर संसारको नक्सामा एउटा यस्तै अद्भुत तर साहसी सपना कोरिएको थियो । त्यो थियो एटलान्टिक र प्रशान्त महासागरलाई जोडेर विशाल दक्षिण अमेरिकी महाद्वीपको हजारौँ किलोमिटर लामो, जोखिमपूर्ण र ज्यानमारा समुद्री यात्रालाई सदाका लागि अन्त्य गर्ने । पनामाको साँघुरो भूभागमा दुई विशाल महासागरलाई मिसाउने यो परिकल्पना केवल व्यापारिक सुगमताका लागि मात्र थिएन, प्रकृतिको शाश्वत नियममाथि मानिसको सर्वोपरि क्षमता स्थापित गर्ने एउटा महान् चुनौती पनि थियो । तर, त्यो हरियो घना जंगल र विषालु वातावरणको गर्भमा एउटा यस्तो भयावह नर्क लुकेको थियो, जसले हजारौँ सपनाहरूलाई आफैँभित्र निल्नेवाला थियो ।

सन् १८८० को दशकमा फ्रान्सले असाधारण उत्साह र गर्वका साथ यो असम्भव देखिने अभियानको ढोका उघारेको थियो । सुप्रसिद्ध इन्जिनियरहरूको टोली, अत्याधुनिक मेसिनरी र करोडौँ फ्र्याङ्कको लगानीका साथ सुरु भएको उक्त परियोजना चाँडै नै एउटा विभीषिकामा परिणत भयो । पनामाको बाक्लो र रहस्यमयी जंगल, मुसलधारे वर्षा, छिनछिनमा आउने विनाशकारी पहिरो अनि त्योभन्दा पनि खतरनाक रूपमा फैलिएको उष्णकटिबन्धीय रोगहरूले फ्रान्सेली टोलीलाई घुँडा टेक्न बाध्य पा¥यो । पहेँलो ज्वरो (एल्लो फिभर) र मलेरियाजस्ता घातक रोगहरूले दैनिक सयौँ मजदुरहरूको ज्यान लिन थाले । मृत्युको कालो छाँया यति बाक्लो भयो कि अस्पतालहरू बिरामीले भरिए र चिहानहरू खन्ने ठाउँसमेत पाउन छाड्यो । अन्ततः रोगको विनाशकारी ताण्डव, प्राविधिक असफलता र भयानक आर्थिक टाटपल्टाईका कारण हजारौँ निर्दोष श्रमिकहरूको रगतले भिजेको फ्रान्सेली सपना बिचमै छिन्नभिन्न भयो र परियोजना पूर्ण रूपमा ठप्प बन्यो ।

स्रोतमा पूरा पढ्नुहोस् (newsofnepal.com)