चार दिनमा ५० हजार बढीले गरे मुक्तिनाथको दर्शन

काठमाडौं । यहाँको पवित्र धार्मिक तिर्थस्थल मुक्तिनाथ मन्दिरमा पछिल्लो चारदिन यता दर्शनार्थी पर्यटकको उपस्थिती बाक्लिएको छ । औसत दैनिक तीनदेखि चार हजार संख्यामा दर्शनार्थी भक्तजनको उपस्थिती हुने गरेको मुक्तिनाथ मन्दिरमा बिहिबारदेखि दैनिक पन्ध्र हजार बढीले दर्शन गर्ने गरेको पाइएको छ ।

मुक्तिनाथ मन्दिर दर्शन गर्ने अनुकुल याम भएपनि विगत वर्षको तुलनामा यसवर्ष मुक्तिनाथमा दर्शनार्थीको संख्या अकल्पनीय रुपमा वृद्धि भईरहेको छ । छिमेकी देश भारतमा गर्मी अत्यधिक बढेका कारण त्यहाँ शैक्षिक संस्थाहरु बन्द भएकाले भारतीय दर्शनार्थी पर्यटकको संख्या अपेक्षाकृत रुपमा बढ्न पुगेको हो । भारतमा एक महिने लामो विद्यालय र कलेजहरु गर्मीका कारण बिदा भएसंगै मुक्तिनाथमा भारतीय पर्यटकको रौनक वृद्धि भएको हो । स्कुल र कलेजहरु बिदा भएकाले त्यहाँका विद्यार्थीहरु मुक्तिनाथ दर्शन गर्ने उद्देश्यले गर्मी छल्न मुक्तिनाथमा आइपुगेका हुन्।