बाढीले झस्किएको सशस्त्र: उद्धार टोली छ, हेलिकोप्टर छैन

भदौ १० गते बिहान भोटेकोसीमा बाढी आएको खबर पाएलगत्तै सशस्त्र प्रहरी बल रसुवाका प्रमुख डिएसपी प्रदीप राईले टिमुरेमा रहेका आफ्ना सहकर्मीलाई सम्पर्कको प्रयास गरे तर कसैलाई फोन लागेन। बाढीको आवाज धुन्चेसम्म सुनिएको थियो। त्यसभन्दा माथि रहेका आफ्ना सहकर्मीको अवस्था कस्तो छ भन्ने सूचना लिन नपाउँदै जिल्लाभरि सञ्चार सम्पर्क विच्छेद भयो।

टिमुरे, स्याफ्रुबेंसी तथा विभिन्न जलविद्युत् आयोजनामा खटिएका कसैलाई पनि सम्पर्कमा ल्याउन नसकेपछि डिएसपी राई आफैं स्याफ्रुबेंसीतिर हानिए। १३४ जनाको फौज लिएर गए पनि १२ घुम्तीबाट अगाडि बढ्न असम्भव भयो। किनकि त्यहाँ बाढीले सबै संरचना तहसनहस बनाइसकेको थियो। ‘हामी त पुरै ब्ल्याक आउट नै भयौं। रसुवागढीदेखि माथिका सबै संरचना तहसनहस भएका थिए। सशस्त्र प्रहरी बलको बोर्डर आउट पोस्ट (बिओपी) मात्रै बाँकी बस्यो। त्यही बिओपीमा भएका नौ जनालाई बाढीले बगायो भने बाँकी १५ जना तत्काल उद्धार र खोजीमा जुटेका थिए।