जलवायु जोखिम उपेक्षित भन्दै बजेटप्रति विज्ञहरूको आलोचना, हरित लगानी गुम्ने चेतावनी [भिडियो]

काठमाडौँ। आर्थिक वर्ष २०८३/८४ को बजेट आर्थिक वृद्धि र भौतिक पूर्वाधार निर्माणमा बढी केन्द्रित देखिए पनि जलवायु परिवर्तन, विपद् जोखिम न्यूनीकरण र सामाजिक समावेशीकरणका सवालमा अपेक्षित ध्यान नदिएको भन्दै विज्ञहरूले गम्भीर आलोचना गरेका छन्।

बजेटमा सडकलाई जलवायुमैत्री बनाउने, चुरे पुनर्भरणमार्फत मधेसमा पानीको समस्या न्यूनीकरण गर्ने, वन संरक्षण तथा हरित ऊर्जा विस्तारजस्ता केही अनुकूलनमुखी कार्यक्रम समेटिए पनि ‘क्लाइमेट स्मार्ट एग्रीकल्चर’, जलवायुजन्य बीमा र जलवायुमैत्री पूर्वाधार निर्माणजस्ता महत्त्वपूर्ण क्षेत्र स्पष्ट रूपमा आत्मसात गर्न नसकिएको विज्ञहरूको भनाइ छ।