त्रिविको काँचुली फेराइ

नेपालमा उच्च गुणस्तरको शिक्षा निर्माण गर्न सकिन्छ। मानव पुँजीको भविष्य यही रूपान्तरणकारी आँटमा निर्भर छ।

कुनै समय नेपालको उच्च शिक्षाको पर्याय मानिने त्रिभुवन विश्वविद्यालय (त्रिवि) आज आफ्नै विशाल आकार र केन्द्रीकृत संरचनाको बोझले थला परेको छ। विश्वभरका विश्वविद्यालयहरू नवीन प्रविधिको युगमा अनुसन्धानमुखी बन्दै गर्दा, त्रिवि भने समयमै परीक्षा र नतिजा निकाल्ने सामान्य प्रशासनिक दायित्वमै रुमल्लिएको छ। संघीयताको अभ्याससँगै देश विकेन्द्रीकृत प्रणालीमा गइसक्दा पनि उच्च शिक्षाको यो पुरानो धरोहर उही एकात्मक र ढिलासुस्त शैलीमै चल्न खोज्नु विडम्बना हो।