मालिकाको अर्जै खण्ड सडक सात दिन बन्द

गुल्मीको मालिका गाउँपालिकास्थित फुलबारी-चोरकाटे-अर्जै-वोम-लिलिङ्ग अन्तर्गत पर्ने वडा नम्बर ६ अर्जै खण्डमा सडक स्तरोन्नति गर्न लागिएको हुँदा सात दिन बन्द हुने भएको छ।

सोमबारदेखि यही जेठ २५ गतेसम्म यस खण्डमा सडक बन्द हुन लागेको मालिका गाउँपालिकाका प्रमुख प्रशासकीय अधिकृत विवेक खनालले जानकारी दिनुभयो।

प्रमुख प्रशासकीय अधिकृत खनालका अनुसार यस सडक खण्डमा स्तरोन्नतिका लागि ढलाई तथा बेस राख्ने कार्य भइरहेको हुँदा यस खण्ड बन्द हुनेभएको हो।यहाँ निर्माणको काम गर्नका यस समयावधिमा सडक पूर्ण रूपमा बन्द गर्न लागिएकाले वैकल्पिक सडक प्रयोग गरेर निर्माण कार्यमा सहयोग गरिदिन गाउँपालिकाले अनुरोध गरेको छ।

यस सडक खण्ड भएर आवतजावत गर्ने सवारीसाधनले वैकल्पिक सडकका रुपमा चापटारी-कुखुरेखोला-पौवाँ-हरिसिँगे-ठाँटी-राम्चे सडक प्रयोग गर्न आग्रह गरिएको छ।सडक स्तरोन्नतिको काममा आवश्यक सहयोगका लागि सबैलाई आग्रह गरिएको छ।