वैदेशिक रोजगारीको कालो ऐना: मेनपावर व्यवसायी, कामदार र राज्यको दोहोरो चरित्र

नेपालको अर्थतन्त्रलाई परनिर्भरताको बैसाखी टेकाएर चलाइरहेको मुख्य जग वैदेशिक रोजगारी नै हो। यस यथार्थलाई कसैले नकार्न र बेवास्ता गर्न सकिँदैन। हरेक वर्ष लाखौं युवाहरू आफ्ना रहर र सपनाहरूलाई एउटा सुटकेसमा पोको पारेर अन्तर्राष्ट्रिय विमानस्थलको प्रस्थान विन्दुमा उभिन्छन्। देशमा रोजगारीको कुनै विकल्प नभएपछि आफ्नो र परिवारको भविष्य सुरक्षित गर्न खाडीदेखि मलेसियासम्मको यात्रा तय गर्नु उनीहरूको बाध्यता हो।

यही बाध्यता र सपनाको बीचमा एउटा बलियो पुलको रूपमा काम गरिरहेको क्षेत्र हो, मेनपावर व्यवसाय। तर विडम्बनाको कुरा, जसले देशमा रेमिट्यान्स भित्र्याउने मुख्य वातावरण तयार गर्छ, जसले लाखौं बेरोजगार युवालाई अन्तर्राष्ट्रिय बजारमा रोजगारीको अवसर खोजिदिन्छ, आज त्यही व्यवसाय र व्यवसायीलाई राज्य संयन्त्र, सञ्चालन माध्यम र समाजले दोस्रो दर्जाको, इज्जतविहीन र शंकास्पद नागरिकको रूपमा व्यवहार गरिरहेको छ।