बसाइँसराइ रोक्ने छथर जोरपाटीको नयाँ सूत्र : पहिले लैनो गाई, अब सुरक्षित आवास

१ असोज, धनकुटा । गाउँबाट मानिसहरू सहरतिर बसाइँ सर्ने क्रम बढिरहेका बेला धनकुटाको छथर जोरपाटी गाउँपालिकाले भने गाउँमा नयाँ परिवार भित्राउने र उनीहरूलाई गाउँमै टिकाउने उपाय खोजिरहेको छ ।

बसाइँसराइ गरेर आउने परिवारलाई गाउँमै बस्ने आधार तयार पार्ने उद्देश्यले गाउँपालिकाले पाँच वर्षअघि एउटा फरक कार्यक्रम सुरु गर्‍यो– दुहुना गाई वितरण । नयाँ ठाउँमा घरजम गर्न आउने परिवारलाई उत्पादनसँग जोड्ने, दूधबाट आम्दानी गर्ने वातावरण बनाउने र स्थानीय अर्थतन्त्रमा सहभागी गराउने उद्देश्यले सुरु गरिएको यो कार्यक्रममार्फत पाँच वर्षमा ५० परिवारले लैनो गाई पाए ।