सामान्य भनाभनपछि कुटपिट, एकजनाको मृत्यु

झापा : झापाको ज्यामिरगढीमा सामान्य विवादपछि भएको कुटपिट घटनामा एक जनाको मृत्यु भएको छ। मृत्यु हुनेमा मेचीनगर नगरपालिका–१५ निलकोठीका ५५ वर्षीय रुद्र श्रेष्ठ रहेका छन्।

प्रहरीका अनुसार गएराति करिब १० बजेको समयमा ज्यामिरगढीका स्थानीय श्रेष्ठ र झापा प्लाई उद्योगमा ज्याला मजदुरी गर्ने दमौली घर बताउने अन्दाजी ३५ वर्षीय रामबहादुर गौतमबीच सामान्य भनाभनपछि कुटपिट भएको थियो।

कुटपिटबाट श्रेष्ठको टाउकोमा गम्भीर चोट लागेको र बोल्न नसक्ने अवस्थामा पुगेका थिए। घटनाबारे जानकारी प्राप्त हुनासाथ प्रहरी चौकी ज्यामिरगढीको टोली घटनास्थल पुगेको थियो। घाइते श्रेष्ठलाई उपचारका लागि प्रादेशिक अस्पताल भद्रपुर पठाइएकोमा आज बिहान ८ बजे चिकित्सकले मृत घोषणा गरेका थिए।

कुटपिटमा संलग्न गौतमलाई इलाका प्रहरी कार्यालय धुलाबारीले नियन्त्रणमा लिएको छ। घटनाबारे थप अनुसन्धान भइरहेको जिल्ला प्रहरी कार्यालय झापाले जनाएको छ।