बहुमतको मूर्ख बल र स्टन्टशैलीले राज्यलाई ठुलो क्षति भयो : प्रमुख सचेतक दुलाल

काठमाडौँ। नेपाल कम्युनिष्ट पार्टीका प्रमुख सचेतक युवराज दुलालले प्रधानमन्त्री बालेन्द्र साहले संसद्मा दिएको सीमा सम्बन्धी अभिव्यक्ति राष्ट्रहितविपरीत, तथ्यहीन र आत्मसमर्पणवादी भएको आरोप लगाएका छन्। प्रतिनिधि सभाको सोमबार बसेको बैठकमा विशेष समय लिएर बोल्दै उनले प्रधानमन्त्रीको उक्त भनाइप्रति गम्भीर आपत्ति जनाएका हुन्।

प्रधानमन्त्री संसद्प्रति जवाफदेही हुनुपर्ने माग अनुसार उपस्थित भएर प्रश्नको उत्तर दिनु सकारात्मक भए पनि सीमा विवादबारे व्यक्त धारणा अक्षम्य रहेको उनको भनाइ छ। प्रमुख सचेतक दुलालले प्रधानमन्त्रीको अभिव्यक्तिमा नेपालको अतिक्रमित भूमि फिर्ता गर्न आवश्यक राष्ट्रिय अडान, कूटनीतिक परिपक्वता र दृढ इच्छाशक्ति नदेखिएको दाबी गरे।