डिप्रेसनले शून्यमा हराएको उत्कर्ष: एन्दरसनको मौन संघर्षले दिएको सामाजिक सन्देश

सन् २०११, आइभोरी कोस्टका फुटबलर बब्ले एन्दरसन आफ्नो करियरको उत्कर्षमा थिए । लिगको उत्कृष्ट खेलाडीको प्रतिष्ठित उपाधि हात पारेपछि उनको नाम फुटबल जगत्को नयाँ नक्षत्रका रूपमा चम्कियो । उनको जादुमय खेल कौशलले ठूला क्लबहरूको ध्यान खिच्यो । एकै वर्षभित्र उनी मोरक्कोको नामी क्लब वायडाड एफसी पुगे । तर, उनको वास्तविक सपना तब पूरा भयो, जब स्पेनको ला लिगा क्लब मल्लागाले उनलाई अनुबन्ध ग¥यो । उनका लागि विश्वको सबैभन्दा ठूलो मञ्चमा आफ्नो क्षमता देखाउने प्रवेशद्वार थियो त्यो ।

सबै राम्रै चल्दै थियो । तर, एकाएक एन्दरसनको यात्रा एक किंवदन्ती झैँ बन्यो । सानो गाउँबाट आएको एक युवा, जसले छोटो समयमै विश्वको सर्वाधिक प्रतिस्पर्धी लिगमा स्थान बनायो । तर, जति तीव्रताका साथ उनले सफलताको शिखर चढेका थिए, त्यति नै भयावह गतिमा उनको पतनको यात्रा सुरु भयो । यो पतन न त चोटले ल्याएको थियो, न त खराब फर्मले । कारण थियो डिप्रेशन ।