राष्ट्र बैंकले ९ अर्ब ६९ करोड रुपैयाँ मुद्दती निक्षेपमा लगानी गर्न माग्यो प्रस्ताव

काठमाडौं । नेपाल राष्ट्र बैंकले आफ्नो विभिन्न कोषमा रहेको रकम वाणिज्य बैंक, विकास बैंक तथा वित्त कम्पनीहरूमा मुद्दती निक्षेपका रुपमा लगानी गर्न ब्याजदर प्रस्ताव आह्वान गरेको छ ।

राष्ट्र बैंकको वित्त व्यवस्थापन विभागले जारी गरेको सूचनाअनुसार बैंक तथा वित्तीय संस्थाहरूबाट कुल ९ अर्ब ६९ करोड ८५ लाख रुपैयाँ बराबरको लगानीयोग्य रकमका लागि प्रस्ताव माग गरिएको हो।

यसअन्तर्गत ‘क’ वर्गका वाणिज्य बैंकका लागि ७ अर्ब ७५ करोड ८९ लाख, ‘ख’ वर्गका राष्ट्रियस्तरका विकास बैंकका लागि १ अर्ब ४५ करोड ४७ लाख र ‘ग’ वर्गका वित्त कम्पनीका लागि ४८ करोड ४९ लाख छुट्याइएको छ।

ब्याजदर प्रस्ताव पेश गर्न बैंक तथा वित्तीय संस्थालाई सिमित ढाँचामा फारम भरी इमेलमार्फत पठाउन भनिएको छ। प्रस्ताव २०८३ असार २० गते राति १२ बजेसम्म र पासवर्ड २०८३ असार २१ गतेभित्र बुझाउनुपर्ने राष्ट्र बैंकले जनाएको छ।

प्रस्ताव गरिएको ब्याजदर ३६८ दिन अवधिको मुद्दती निक्षेपका लागि हुनेछ, जसको अवधि १८ जुन २०२६ देखि २० जुन २०२७ सम्म रहनेछ। राष्ट्र बैंकले प्रस्तावित ब्याजदर सो अवधिभर मान्य हुने स्पष्ट पारेको छ।

राष्ट्र बैंकले इजाजतप्राप्त बैंक तथा वित्तीय संस्थाहरूलाई निश्चित शर्तहरू पूरा गरेर प्रस्ताव पेश गर्न आह्वान गरेको छ । शर्तअनुसार संस्था कम्तीमा दुई वर्ष सञ्चालनमा आएको हुनुपर्ने, न्यूनतम पूँजीकोष अनुपात कायम गरेको हुनुपर्ने, निष्कृय कर्जा (एनपीएल) सीमा भित्र रहेको हुनुपर्ने, तरलता तथा कर्जा–निक्षेप अनुपात तोकिएको सीमाभित्र रहेको हुनुपर्ने तथा पछिल्लो आर्थिक वर्षमा खुद नाफामा रहेको हुनुपर्ने व्यवस्था गरिएको छ।

त्यस्तै, शीघ्र सुधारात्मक कारबाहीमा नपरेको वा त्यस्तो कारबाहीबाट कम्तीमा छ महिना फुकुवा भएको हुनुपर्ने, समस्याग्रस्त घोषणा नभएको वा फुकुवा भएको छ महिना पूरा भएको हुनुपर्ने र सर्वसाधारणलाई छुट्याइएको सेयर जारी गरिसकेको हुनुपर्ने पनि सर्तमा उल्लेख छ।