कूटनीतिको रङ्गमञ्चमा बालेन सरकार

कुनै पनि देशको कूटनीति भव्य महलमा हुने ठूला सम्झौताबाट मात्र बन्दैन, देशको प्रधानमन्त्री संसद्को कुर्सीबाट कतिपटक उठेर हिँड्छन्, कतिपटक विदेशी राजदूतलाई भेट्ने समय दिन्छन् र कुन बेला सामाजिक सञ्जालमा के लेख्छन् भन्ने सामान्य देखिने व्यावहारिक क्षणहरूले पनि यसको रेखा कोरिन्छ ।

बालेन्द्र शाह नेतृत्वको सरकार सत्तामा आएको केही महिनामै यो कुरा नेपालको सन्दर्भमा नाङ्गो सत्यका रूपमा देखिइसकेको छ । जुन सरकारले भ्रष्टाचारविरुद्ध जेनजी आन्दोलनको काँधमा चढेर ऐतिहासिक दुई तिहाइनजिकको बहुमत ल्यायो, त्यही सरकारको सञ्चालन शैलीले अहिले नेपालको अन्तर्राष्ट्रिय छवि र कूटनीतिक विश्वसनीयतामाथि गम्भीर प्रश्न उठाइरहेको छ । शुरुवाती दिनदेखि हालसम्मको क्रम मिलाएर हेर्ने हो भने, यो प्रवृत्ति संयोग नभई एउटा स्पष्ट कार्यशैली र गुप्त रणनीतिको नतिजाजस्तो देखिन्छ ।