संघर्षका महापुरुष मेरो हजुरबुबा!

राजधानीबाट पूर्व काभ्रेको लप्सेगाउँ बिहान कुहिरोभित्र जन्मिन्थ्यो। रातभरि महाभारतका पहाडहरूसँगै नागी, कमेरोखानी हुँदै भटासे र नयाँ गाउँका ससाना डाँडाले गाउँलाई सुम्सुम्याउँदै आफ्नै काखमा सुताइराख्थे।

सूर्योदयका पहेँला किरणहरूले कुहिरो चिर्दै घरका ढोकाबाट भित्र पस्दा गाउँ विस्तारै ब्युँझिन्थ्यो। रातेमाटो, कमेरो र गोबरले लिपिएका घरहरू, चिल्ला ढुंगाका पिँढी, करेसाको छेउ र आँगनभरि फुलेका चमेली र सयपत्रीका फूल, सुन्तलाका घारी अनि गोठबाट सुनिने गाईबाख्राका स्वरले गाउँलाई जीवित बनाइरहेका हुन्थे।