राष्ट्रिय परिचयपत्रको विदेशी ठेक्का किन रद्द गरियो ? यस्तो छ सरकारको नयाँ योजना

काठमाडौं । राष्ट्रिय परिचयपत्र व्यवस्थापन प्रणाली सञ्चालन र मर्मतसम्भारका लागि अघि बढाइएको अन्तर्राष्ट्रिय परामर्श सेवा खरिद प्रक्रिया सरकारले रद्द गरेको छ । अबदेखि राष्ट्रिय परिचयपत्रसम्बन्धी प्राविधिक व्यवस्थापन, प्रणाली सञ्चालन र परिचयपत्र छपाइका काम सरकारी संयन्त्रमार्फत नै गर्ने निर्णय भएको छ ।

गृह मन्त्रालयअन्तर्गतको राष्ट्रिय परिचयपत्र तथा पञ्जीकरण विभागले सूचना प्रणालीको दीर्घकालीन सञ्चालनका लागि आवश्यक प्राविधिक काम स्वदेशी जनशक्ति र सरकारी संरचनाबाटै अघि बढाउने जनाएको छ । विभागले प्रधानमन्त्री तथा मन्त्रिपरिषद्को कार्यालयसँग समन्वय गरी नयाँ व्यवस्थापन योजना कार्यान्वयन गर्ने तयारी गरेको छ ।