विश्व बिरामी सुरक्षा दिवस: नेपालमा ७१ प्रतिशत मृत्यु नसर्ने रोगबाट

काठमाडौं– स्वास्थ्य सेवा विभागले 'सुरक्षित उपचार र निरन्तर हेरचाह, नसर्ने रोग व्यवस्थापनको बलियो आधार' भन्ने मूल नाराका साथ ‘विश्व बिरामी सुरक्षा दिवस २०२६’ मनाएको छ। तीव्र रूपमा बढिरहेका नसर्ने रोगहरूको व्यवस्थापनमा बिरामीको सुरक्षा सुनिश्चित गर्न र उपचारजन्य त्रुटिहरू न्यूनीकरण गर्न सुरक्षित चिकित्सा प्रणाली एवं निरन्तर निगरानीको अपरिहार्यतालाई विभागले जोड दिएको छ।

विभागद्वारा जारी विज्ञप्तिअनुसार संसारभर हुने कुल मृत्युको ७५ प्रतिशत र नेपालमा कुल मृत्युको ७१ प्रतिशतभन्दा बढी हिस्सा मुटुरोग, क्यान्सर, दम र मधुमेहजस्ता नसर्ने दीर्घ रोगका कारण हुने गरेको छ। बदलिँदो जीवनशैली, अस्वस्थ खानपान, शारीरिक निष्क्रियता, मानसिक तनाव, बढ्दो सहरीकरण, प्रदूषण तथा सुर्तीजन्य र मदिराको सेवन यसका मुख्य कारण रहेको जनाइएको छ।