फायरिङ अभ्यासका क्रममा ग्रिनेड विस्फोट हुँदा एक सैनिकको मृत्यु, एक घाइते

काठमाडौं । कैलालीमा ग्रिनेड विस्फोट हुँदा नेपाली सेनाका हुद्दाको मृत्यु भएको छ । विस्फोटमा सहसेनानी घाइते भएका छन् । मोहन्याल गाउँपालिका–७ को जालपा सामुदायिक वन क्षेत्रमा सञ्चालन भइरहेको फायरिङ अभ्यासका क्रममा ग्रिनेड विस्फोट प्रहरीले जनाएको छ ।

कैलालीका प्रहरी प्रवक्ता डीएसपी योगेन्द्र तिमिल्सिनाका अनुसार घटनामा नेपाली सेनाका हुद्दा हिमालविक्रम विष्टको मृत्यु भएको हो । विष्टको लम्कीस्थित लालरत्न अस्पतालमा उपचारका क्रममा दिउँसो १२ बजेतिर मृत्यु भएको र सोही घटनामा नजिकै रहेका सहसेनानी हिमराज जोशी पनि छर्रा लागेर घाइते भएको जनाइएको छ ।