भारतमा अचाक्ली गर्मी, नेपालको तराईमा कस्तो छ ?

‍‍‍‍‍काठमाडौँ । पछिल्लो साता भारत उत्तरप्रदेशको बान्दा सहरमा ४८ डिग्री सेल्सियसम्म तापक्रम पुग्यो । राजस्थानको श्रीगंगानगर, हरियाणाको सीर्सामा पनि यही हाराहारीमा तापक्रम पुग्यो । चर्को गर्मीले जनजीवन प्रभावित भइरहेको छ । घर बाहिर निस्कनै सकस छ भने दिउँसोको समयमा पसल व्यवसाय सबै ठप्प छन् । विद्यालयमा केही दिन बिदा दिइयो ।

खासगरी उत्तरी भारतमा गर्मी अचाक्ली नै छ । भारतका महानगरहरूतर्फ राजधानी दिल्ली सबैभन्दा तातो छ । त्यहाँ पनि गत साता ४५ डिग्रीसम्म तापक्रम पुग्यो । मुम्बई, चेन्नाई, हैदराबाद, बैंग्लोर, अहमदाबाद र पुनेमा पनि चर्को गर्मी छ । हाल प्रि-मनसुनका कारण केही मात्रामा वर्षा हुँदा तापक्रम केही घटेपनि घाम लाग्दा गर्मी उस्तै छ ।