राज्यले रोजगारी प्रवर्द्धनलाई प्राथमिकता दिनुपर्छ : माधव नेपाल

काठमाडौं : नेपाली कम्युनिष्ट पार्टी (नेकपा) का सहसंयोजक एवं पूर्व प्रधानमन्त्री माधवकुमार नेपालले रोजगारी प्रवर्द्धनका क्षेत्रहरुलाई राज्यले प्राथमिकता दिनुपर्ने बताएका छन् ।

शनिबार काठमाडौंमा नेपाल सुनचाँदी कला व्यवसायी संघको अधिवेशन उद्घाटन गर्दै नेपालले रोजगारी नपाएर मानिसहरू संसारमा भौतारिनु पर्ने अवस्था रहेको भन्दै स्वदेशमा नै रोजगारी प्रवर्द्धनका क्षेत्रहरुलाई राज्यले प्राथमिकता दिनुपर्ने बताएका हुन् । उनले कुनै पनि व्यवसायमा प्रतिकूल असर नपरोस् भन्नका लागि विशेष ध्यान दिनुपर्ने आवश्यकता रहेको बताए ।

उनले आफ्नै देशमा उत्पादन गर्न र उपभोग गर्दै विदेशमा निर्यात गर्न सके आयात केन्द्रित अर्थतन्त्र निर्यातमुखी हुने स्थिति बन्न सक्ने उल्लेख गरे । देशको अर्थतन्त्रको विस्तार र राजस्वमा बृद्धिका लागि सिङ्गो उद्योग व्यवसाय पनि फस्टाउनु पर्ने उनको भनाइ छ । उनले देशको उद्योग धन्दाहरू पनि फस्टाउन सके नागरिकहरु पनि आर्थिक रूपमा सवल हुने र क्रय शक्ति बढ्ने धारणा राखे ।