प्रहरी बन्ने सपना अधुरो भएपछि सिकेको सीपले बनायो आत्मनिर्भर

कैलालीको टिकापुर नगरपालिका–१ राजीपुर गाउँका ३० वर्षीय सुरेश चौधरीको सपना नेपाली प्रहरी बन्ने थियो। यही लक्ष्यका साथ उनले २०७७ सालमा प्रहरी भर्नाका लागि आवेदन दिएका थिए। तर नतिजा अपेक्षाअनुसार आएन। प्रहरी बन्ने सपना अधुरै रह्यो र कक्षा ११ पछि पढाइ पनि रोकियो। त्यसपछि उनले अर्को बाटो रोजे-सीप र श्रमको।

दुई वर्षअघि रोजगारीको खोजीमा जुम्ला पुगेका चौधरी अहिले जिल्लाभरि परिचित पेन्टिङ कामदारका रूपमा स्थापित भएका छन्। पेन्टिङ, टायल बिछ्याउने, भवन सजावट, आर्ट तथा चित्र निर्माणजस्ता काममा दक्ष उनी हाल चन्दननाथ बहुउद्देश्यीय सहकारी संस्थाको भवनमा पेन्टिङ गरिरहेका छन्। उक्त कामका लागि १२ हजार रुपैयाँ पारिश्रमिक तय भएको छ। उनका अनुसार यो काम तीन दिनभित्र सम्पन्न हुनेछ।