महँगिएको भान्सा बारे सरकारलाई कति थाहा छ ?

ग्यास अभाव, महँगोमा किन्नुपर्ने बाध्यता र दैनिक उपभोग्य वस्तुको निरन्तर मूल्यवृद्धिले सर्वसाधारणको भान्सा महँगिँदै गएको छ । बजारमा खाना पकाउने ग्यास सहज रूपमा नपाउनेदेखि पाउँदा पनि तोकिएकोभन्दा बढी मूल्य तिर्नुपर्ने गुनासो बढिरहेका बेला तेल, चामल, तरकारीलगायत खाद्य पदार्थको मूल्यवृद्धिले उपभोक्ताको दैनिकी थप कठिन बनाएको छ ।

सरकारले सार्वजनिक गर्ने मूल्य तथा मुद्रास्फीतिसम्बन्धी तथ्यांकले समग्र बजारको औसत अवस्था देखाए पनि नागरिकले दैनिक खरिद गर्ने वस्तुको वास्तविक मूल्य, उपलब्धता र खर्चको चापसँग त्यसको तालमेल नमिलेको गुनासो छ । तथ्यांकमा मूल्यवृद्धि सीमित देखिए पनि भान्सामा त्यसको प्रभाव फरक ढंगले महसुस भइरहेको छ ।