सरकारी आश्वासनले खुले चिया उद्योग: हरियो पत्ति किन्न थालियो

भारतीय पक्षबाट नेपाली चिया निर्यातमा अवरोध भएपछि बन्द भएका इलामको सूर्योदय नगरपालिकाका चिया उद्योगहरू पुनः सञ्चालनमा आएका छन्। उद्योगीहरूले स्थानीय तह र संघीय सरकारबाट समस्या समाधानका लागि प्रतिबद्धता आएपछि उद्योग सञ्चालन पुनः सुरु गरिएको बताएका छन्।

भारतीय टी बोर्डको अवरोधका कारण नेपाली चिया भारत निर्यात हुन नसक्दा उत्पादन भएको चिया भण्डारण गर्न कठिन हुने, किसानलाई भुक्तानी दिन नसकिने तथा उद्योग सञ्चालन नै प्रभावित हुने अवस्था सिर्जना भएको थियो। यही कारण देखाउँदै सूर्योदय नगरपालिकाभित्र सञ्चालित ५३ वटा चिया उद्योगले असार १ गतेदेखि उद्योग बन्द गरेका थिए।