आरसीबी फ्यान क्लब नेपालद्वारा नेपाली क्रिकेटर आसिफ शेखलाई हस्ताक्षरित आरसीबी जर्सी प्रदान

काठमाडौँ । इन्डियन प्रिमियर लिग (आईपीएल) अन्तर्गतको लोकप्रिय फ्रेन्चाइज टोली रोयल च्यालेन्जर्स बेङ्गलुरु (आरसीबी) को नेपालस्थित आधिकारिक मान्यता प्राप्त समर्थक समूह आरसीबी फ्यान क्लब नेपालले नेपाली राष्ट्रिय टोलीका क्रिकेटर आसिफ शेखलाई विशेष सम्मान प्रदान गरेको छ।

श्रावण २२ गते क्लबले राष्ट्रिय टोलीका विकेटकिपर ब्याट्सम्यान आसिफ शेखसँग विशेष अन्तर्वार्ता सम्पन्न गरेको थियो। उक्त अन्तर्वार्तामा आसिफले आफ्नो क्रिकेट यात्रा, नेपाली क्रिकेटको वर्तमान अवस्था, सुधारका सम्भावना, विराट कोहलीप्रतिको सम्मान र आरसीबीप्रतिको व्यक्तिगत लगावबारे आत्मीय ढङ्गले विचार व्यक्त गरेका थिए। उनले आफू आरसीबीको पुरानै फ्यान भएको बताउँदै विराट कोहलीलाई प्रेरणाको स्रोतका रूपमा व्याख्या गरे।