भ्रष्टाचार मुद्दामा प्रतिकूल बकपत्र गरेपछि सरकारी साक्षीविरुद्ध नै मुद्दा

काठमाडौं : अख्तियार दुरुपयोग अनुसन्धान आयोगले रसुवा कन्स्ट्रक्सनका सञ्चालक राजेन्द्रराज आचार्यविरुद्ध भ्रष्टाचार मुद्दा दायर गरेको छ। आयोगले सागरनाथ वन विकास परियोजनाको जग्गामा उत्खनन् गरिएको नदीजन्य पदार्थको रोयल्टी असुल नगरी राजश्व चुहावट गरी भ्रष्टाचार गरेको मुद्दामा सरकारी साक्षीका रूपमा पेस गरिएका आचार्यविरुद्ध बिहीबार विशेष अदालतमा आरोप पत्र दायर गरेको हो। उनीविरुद्ध ९ लाख ५३ हजार ४ सय ९६ रुपैयाँ बिगो माग गरेको छ।

विशेष अदालतमा २०८३ भदौ १० गते बकपत्र गर्दा आयोगका अनुसन्धान अधिकृतसमक्ष दिएको बयानविपरीत बकपत्र गरेको पाइएपछि उनलाई सरकारी साक्षीबाट प्रतिवादी कायम गरी आज विशेष अदालत काठमाडौंमा आरोपपत्र दायर गरिएको आयोगका प्रवक्ता सुरेश न्यौपानेले जानकारी दिए।