छाता ऐन कि स्वास्थ्य विज्ञान विश्वविद्यालय?

नेपालको स्वास्थ्य शिक्षा क्षेत्रमा यतिबेला एउटा महत्त्वपूर्ण बहस चलिरहेको छ- स्वास्थ्य शिक्षा तथा स्वास्थ्य विज्ञानसँग सम्बन्धित विभिन्न संस्थाहरूलाई छाता ऐन अन्तर्गत ल्याउने कि उनीहरूको विशिष्टता र स्वायत्ततालाई कायम राख्दै थप सुदृढ बनाउने? यो बहसको केन्द्रमा रहेको संस्थामध्ये एक हो, बीपी कोइराला स्वास्थ्य विज्ञान प्रतिष्ठान, धरान।

स्वास्थ्य शिक्षा सुधार, गुणस्तर अभिवृद्धि र संस्थागत समन्वयको नाममा छाता ऐनको अवधारणा अगाडि सारिएको छ। उद्देश्य राम्रो हुन सक्छ, तर हरेक संस्थाको इतिहास, योगदान, कानुनी आधार र राष्ट्रिय आवश्यकता समान हुँदैन। विशेषगरी बीपी कोइराला स्वास्थ्य विज्ञान प्रतिष्ठान जस्तो संस्था, जसले विगत ३३ वर्षदेखि नेपालको स्वास्थ्य शिक्षा, स्वास्थ्य सेवा र अनुसन्धानमा अग्रणी भूमिका निर्वाह गर्दै आएको छ, त्यसलाई अन्य संस्थासँग एउटै संरचनामा राख्ने विषय गम्भीर अध्ययन र राष्ट्रिय बहसको विषय बन्नुपर्छ।