बजेट पारितपछि संसद् ‘बिजनेसविहीन’ बन्ने खतरामा

सङ्घीय संसद्को चालु बजेट अधिवेशन अहिले मुख्य कार्यभारको अन्तिम चरणमा पुगेको छ। विनियोजन विधेयक पारित भएपछि प्रतिनिधिसभामा बजेटसँग आश्रित विधेयकहरू (आर्थिक विधेयक र राष्ट्र ऋण उठाउने विधेयक) पारित गर्ने प्रक्रिया चलिरहेको छ। यी दुई विधेयक शुक्रबार प्रतिनिधिसभाबाट पारित गर्ने कार्यसूची रहेको छ। यसबाहेक सरकारले ल्याएका अध्यादेशमध्ये चार अध्यादेशका प्रतिस्थापन विधेयकमाथिको छलफल पनि अघि बढाइनेछ। दुवै सदनबाट यी प्रतिस्थापन विधेयक यही असार २६ गतेभित्र पारित हुनुपर्छ।

राष्ट्रियसभामा विनियोजन विधेयक पारित हुन बाँकी छ। त्यसपछि आश्रित विधेयकहरू पारित गरिनेछन्। प्रतिनिधिसभामा प्रतिस्थापन विधेयक बहुमतको बलमा छिट्टै पारित गरेर पठाए पनि राष्ट्रियसभाले छलफल लम्ब्याउने सम्भावना रहेको छ। जसका कारण असार २६ गतेभित्र प्रतिस्थापन विधेयक पारित गर्न सकिने अवस्था नदेखिएको संसद् सचिवालयका अधिकारीहरू बताउँछन्। राष्ट्रियसभाको विधायन व्यवस्थापन समितिमा चार प्रतिस्थापन विधेयकमाथि छलफल भए पनि सभामा छलफलका लागि नयाँ विधेयक आवश्यक पर्छ। दुवै सदन ‘बिजनेसविहीन’ हुन नदिन सरकारले केही विधेयक माथिल्लो सदनमा र केही विधेयक तल्लो सदन प्रतिनिधिसभामा दर्ता गर्ने गरेको छ। तर सरकारले पर्याप्त विधेयकको मस्यौदा तयार भइरहेको बताए पनि अहिलेसम्म संसद्मा दर्ता नगरेकाले संसद् ‘बिजनेसविहीन’ हुने संकेत देखिएको संसद् सचिवालयका अधिकारीहरूको भनाइ छ।