विद्या भण्डारीको सदस्यता नवीकरणमा झमेला, अनि युवराजले ओलीलाई रोके

काठमाडौं । नेकपा (एमाले) अध्यक्ष बन्ने गरी कदम अघि बढाएकी पूर्वराष्ट्रपति विद्यादेवी भण्डारीको सदस्यतामै लफडा भएको छ । दुई दिनसम्म चलेको पोलिटब्युरो कमिटी बैठकमा भण्डारीको सदस्यता नै नवीकरण नहुने तर्क नेताहरूले गरेका छन् ।

पार्टी विधानको धारा ८(क)बमोजिम भण्डारीको सदस्यता नवीकरण नहुने विषय बैठकमा उठाइएको हो । विधानको धारा (८)मा पार्टी सदस्यताको समाप्ति र प्राप्तिको व्यवस्था छ । त्यहाँ ‘क’मा स्वेच्छाले सदस्यता त्यागेमा सदस्यता नरहने उल्लेख छ । राष्ट्रपति बन्ने भएपछि भण्डारीले एमाले परित्याग गरेकी थिइन् ।