गगनलाई पूर्णबहादुरको आग्रह- महाधिवेशन रोकेर वार्ता थाल्नुस्, अझै एकता सम्भव छ

१ असोज, काठमाडौं । नेपाली कांग्रेसका पूर्वकार्यवाहक सभापति पूर्णबहादुर खड्काले सभापति गगन थापासँग महाधिवेशन रोकेर वार्ता थाल्न आग्रह गरेका छन् । बिहीबार सामाजिक सञ्जालमार्फत उनले अझै पार्टी एकता सम्भव रहेको बताउँदै यस्तो सुझाव दिएका हुन् ।

‘तपाईं आज जुन निर्णयमा पुग्नुभयो, त्यो निर्णय वैशाख २१ को हामीबीच भएको संवादपछि त्यही महिनामा निर्णय गर्नुभएको भए जेठको पहिलो साताभित्र सिंगो कांग्रेस तपाईंको नेतृत्वमा सानेपा पार्टी केन्द्रीय कार्यालयमा सम्पूर्ण रूपमा एकताबद्ध भएर जुरुक्क उभिन्थ्यो,’ खड्काले लेखेका छन्, ‘देशभरि मात्र होइन, संसारभरि रहनुभएका नेपाली कांग्रेसका नेता, सदस्य, शुभचिन्तक सबैमा कति ठूलो उत्साह, हौसला र पार्टी निर्माणका लागि कति ठूलो ऊर्जा सिर्जना हुन्थ्यो होला ?’