विश्वप्रसिद्ध जगन्नाथ रथयात्रा : मानव सागरले भरियो पुरीको सडक

ओडिसा । भारतको ओडिशास्थित पुरीमा विश्वप्रसिद्ध भगवान् श्रीजगन्नाथ रथयात्रा यस वर्ष पनि भव्य रूपमा सुरु भएको छ। भगवान् जगन्नाथ, उनका दाजु बलभद्र र बहिनी सुभद्रालाई विशाल काठका रथमा विराजमान गराई श्रीमन्दिरबाट गुन्डिचा मन्दिरसम्म लैजाने यो यात्रा हिन्दू धर्मका सबैभन्दा महत्वपूर्ण धार्मिक पर्वहरूमध्ये एक मानिन्छ। यस अवसरमा भारतका विभिन्न राज्यका साथै नेपाल र विश्वका अनेक देशबाट आएका श्रद्धालुहरूले पुरीलाई भक्तिमय बनाएका छन्।

जगन्नाथ रथयात्राको सबैभन्दा ठूलो विशेषता भगवान् स्वयं मन्दिरबाट बाहिर निस्केर आफ्ना भक्तमाझ पुग्नु हो। सामान्यतया मन्दिरभित्र मात्र दर्शन गर्न सकिने भगवान् जगन्नाथ यस दिन सबैका लागि सहज रूपमा दर्शनयोग्य हुन्छन्। धार्मिक मान्यताअनुसार श्रद्धा र भक्तिभावका साथ रथ तान्ने वा रथको दर्शन गर्ने व्यक्तिले विशेष पुण्य प्राप्त गर्ने विश्वास रहिआएको छ। यो यात्रा केवल धार्मिक अनुष्ठान मात्र नभई समानता, सेवा, करुणा, सामाजिक सद्भाव र मानव एकताको सन्देश बोकेको सांस्कृतिक महापर्वका रूपमा पनि परिचित छ।