नौलीखोला पुलको काम बल्ल ४० प्रतिशत

गोरखा — बेनीघाट–आरुघाट–लार्के सडक खण्डअन्तर्गत धार्चे गाउँपालिका–७ लापुबेंसीस्थित नौलीखोला मोटरेबल पुल निर्माणको काम बल्ल ४० प्रतिशत भएको छ । २०७९ साउनमा दुई वर्षभित्र सक्ने गरी ठेक्का सम्झौता भएको थियो ।

तोकिएको समयमा पुल निर्माण नभएपछि ठेक्काको म्याद २०८२ साउनसम्म एक वर्ष थप भएको पूर्वाधार कार्यालय गोरखाका इन्जिनियर मोहन श्रेष्ठले बताए । ‘बर्खाका बेला नौलीखोला बढेर काम गर्न नसकिने स्थिति बन्यो, हिउँदमा मात्र काम गर्नुपर्ने बाध्यता छ, फेरि गाडी हिँड्ने वैकल्पिक बाटो पनि छैन, यसो हुँदा पनि ढिलाइ भएको छ,’ उनले भने ।