राष्ट्रिय परिचय पत्र बनेपछि दंग पारु

लमजुङ — आफन्त र गाउँलेको आश्रयमा बस्दै आएकी क्व्होलासोथार गाउँपालिका–७, कुम्लुङकी पारु भनेर चिनिने ६० वर्षीया सर्किनी कामी सामाजिक सुरक्षा भत्ता पाउने भएपछि खुसी छन् । पहिले बनाएको नागरिकता झुत्रो भएपछि प्रतिलिपि तयार गर्नुका साथै उनको राष्ट्रिय परिचय पत्रसमेत तयार गरिएको छ ।

तर, पारुका लागि यो काम सहज थिएन । दुई दशकअघि बुवाआमा गुमाएकी उनी एक्ली छन् । सहारा नभएकाले कहिले वल्लो गाउँ–पल्लो गाउँ गर्दै दिन कटाइरहेकी छन् । जहाँ बस्न दिन्छन्, त्यहीँ उनको रात कट्छ । राम्रोसँग बोल्न सक्दिनन् । शरीरले साथ दिँदैन, हिँडडुल गर्न गाह्रो छ । मानसिक सन्तुलन सबल छैन । यसअघि गाउँमा आएको घुम्ती टोलीले उनको नागरिकता बनाइदिएको थियो । नागरिकता झुत्रो भएकाले राष्ट्रिय परिचयपत्र बनेको थिएन ।