इंग्ल्यान्डसँग भारत पराजित

जो रुटको अविजित ९९ रनको उत्कृष्ट इनिङ्सको मद्दतमा इंग्ल्यान्डले भारतलाई दोस्रो एकदिवसीय अन्तर्राष्ट्रिय (ओडीआई) मा ४ विकेटले पराजित गर्दै ३ खेलको सिरिजमा १-१ को बराबरी गरेको छ । सोफिया गार्डेन्समा भारतले दिएको २ सय ३४ रनको लक्ष्य इंग्ल्यान्डले ४४.१ ओभरमा ६ विकेट गुमाएर पूरा गर्यो।

रुट शतकबाट मात्र एक रनले चुके पनि उनले अन्तिमसम्म क्रिजमा रहँदै टोलीलाई जित दिलाए। गस एट्किन्सन २३ रनमा अविजित रहे। इंग्ल्यान्डको सुरुवात खराब रह्यो। बेन डकेट पहिलो बलमै आउट भए भने जेकब बेथेल ४ रन जोडे । कप्तान ह्यारी ब्रुक पनि १६ रन बनाएर आउट हुँदा इंग्ल्यान्ड ५३–३ को कठिन अवस्थामा पुगेको थियो। तर अनुभवी रुटले संयमित ब्याटिङ गर्दै टोलीलाई सम्हाले। उनले साम करन (२६), विल ज्याक्स (३०) र अन्त्यमा एट्किन्सनसँग महत्वपूर्ण साझेदारी गर्दै इंग्ल्यान्डलाई जिततर्फ डोर्याए।