पग्लिँदो सगरमाथाको पुकार

विश्वको सर्वोच्च शिखर सगरमाथा मानव साहस, संकल्प र सम्भावनाको प्रतीक हो। सन् १९५३ मे २९ मा एडमन्ड हिलारी र तेन्जिङ नोर्गे शेर्पाले पहिलोपटक यसको सफल आरोहण गरेपछि सगरमाथा विश्वका हजारौं मानिसको सपनाको गन्तव्य बनेको छ।

सात दशकभन्दा बढीको यात्रामा नौ हजारभन्दा बढी आरोही शिखरमा पुगेका छन्। आज सगरमाथा केवल कीर्तिमान र गौरवको कथा मात्र होइन, गम्भीर संकटको संकेत पनि बनेको छ। बढ्दो भिड, थुप्रिँदै गएको फोहोर र जलवायु परिवर्तनका कारण तीव्र गतिमा बदलिँदो हिमाली वातावरणले सगरमाथाको भविष्यलाई नै चुनौती दिइरहेको छ।