डिजिटल युगमा वित्तीय सुरक्षा : मोबाइल नम्बर अद्यावधिक किन जरुरी ?

काठमाडौं । आजको डिजिटल युगमा बैंकिङ सेवा, मोबाइल वालेट र अनलाइन भुक्तानी प्रणाली हाम्रो दैनिक जीवनको अभिन्न हिस्सा बनिसकेका छन् । तर, मोबाइल नम्बर परिवर्तन भएपछि त्यसबारे सम्बन्धित बैंक वा वित्तीय सेवा प्रदायकलाई जानकारी नदिँदा ठूलो आर्थिक जोखिम निम्तिन सक्ने भन्दै नेपाल राष्ट्र बैंकले सर्वसाधारणलाई सचेत गराएको छ ।

मोबाइल बैंकिङ, इन्टरनेट बैंकिङ तथा विभिन्न डिजिटल वालेट सेवाहरू प्रयोग गर्दा ग्राहकको मोबाइल नम्बर र इमेल ठेगाना मुख्य पहिचानका रूपमा प्रयोग हुने गर्छन् । खातासम्बन्धी सूचना, कारोबारको विवरण, ओटीपी (वन टाइम पासवर्ड) लगायतका संवेदनशील जानकारी यिनै माध्यमबाट आदानप्रदान हुने भएकाले मोबाइल नम्बर परिवर्तन भएमा त्यसको जानकारी समयमै अद्यावधिक गर्नु अत्यन्त आवश्यक रहेको राष्ट्र बैंकको भनाइ छ ।