प्रधानमन्त्री वालेन्द्र शाह मेयर हुँदा काठमाडौं महानगरमा सबैभन्दा धेरै बेरुजु, सबैभन्दा कम ललितपुरमा

काठमाडौ । महालेखापरीक्षकको ६३ औं वार्षिक प्रतिवेदनअनुसार गत आर्थिक वर्ष २०८१/८२ मा सबैभन्दा बढी बेरुजु काठमाडौंको र कम ललितपुर महानगरपालिकाको देखिएको छ । ६ वटा महानगरपालिकामध्ये केहीले मात्र बेरुजु घटाएका छन्। केही महानगरपालिकाको बेरुजुमा अझै सुधार हुन सकेको छैन

। महालेखापरीक्षकको ६३ औं वार्षिक प्रतिवेदनअनुसार काठमाडौं महानगरको २८ अर्ब २९ करोड १३ लाख ८४ हजार रुपैयाँको लेखापरीक्षण गरिएकामा ६१ करोड ९७ लाख ६३ हजार रुपैयाँ रकम बेरुजु देखिएको हो । कुल लेखापरीक्षण गरिएको रकममा यो २.१९ प्रतिशत हुन आउँछ । जब कि अघिल्लो वर्षमा यस महानगरपालिकाको २७ अर्ब ५२ करोड ४४ लाख ६ हजा रुपैयाँको लेखापरीक्षण गरिएकामा २.४७ प्रतिशत रकम बेरुजु देखिएको थियो। यो अंकमा ६८ करोड २ लाख ३६ हजार रुपैयाँ हुन आउँछ। दुवै आर्थिक वर्षमा बजेट विनियोजन हुँदा महानगरपालिकाको प्रमुखमा हालका प्रधानमन्त्री वालेन्द्र शाह थिए।