कपडा पसलको आवरणमा अवैध वित्तीय कारोबार गर्ने अग्रवालसम्म कसरी पुग्यो प्रहरी ?

सुर्खेत । कपडा पसलको आवरणमा अवैध वित्तीय कारोबार गर्ने श्यामसुन्दर अग्रवाल पक्राउ परेका छन् । सुर्खेतको मुख्य व्यापारिक केन्द्र मंगलगढी चोकनजिकै कपडा पसलको आवरणमा अवैध वित्तीय कारोबार हुने गरेको विशेष सूचनाका आधारमा जिल्ला प्रहरी कार्यालय सुर्खेत र कर्णाली प्रदेश प्रहरी कार्यालयको संयुक्त टोलीले सोमबार श्यामसुन्दर अग्रवाल उर्फ ‘बालाजी’लाई नियन्त्रणमा लिएको हो ।

अग्रवालले वीरेन्द्रनगरका केही स्थानीयसँग थोरै पैसामा सुनका गरगहना धरौटीमा राख्ने र आफ्नो नगद पैसा चर्को ब्याजमा उनीहरूलाई लगानी गरी ब्याज असुल्ने गरेको पीडितहरूले जिल्ला प्रहरी कार्यालय सुर्खेत र प्रदेश प्रहरी कार्यालयमा सूचना दिएका थिए ।

अग्रवालले नगद लगानी गर्न सुनका गरगहना धरौटीमा राख्ने गरेका थिए । उनले नगदको ब्याज आउने दिन गनेर बस्थे । र, त्यो दिन लगानी गरेको नगदको ब्याज उनीसम्म आइनपुगे धरौटीमा राखेका सुनका गरगहना फिर्ता दिँदैनथे ।

पीडितहरूको सूचनाकै आधारमा सोमबार प्रहरीले अग्रवालको पसल र उनी बस्ने कोठामा छापा मार्दा वीरेन्द्रनगर–६ तल्लो बजारस्थित कपडा पसलबाट अनुमानित तीन करोड रुपैयाँ बराबरको अवैध सुनचाँदीका गरगहना र लाखौँ नगदसहित अग्रवाललाई प्रहरीले नियन्त्रणमा लियो ।

अग्रवालको स्थायी ठेगाना भने बाँकेको नेपालगन्ज उपमहानगरपालिका–१० हो । उनी लामो समयदेखि कर्णाली प्रदेशको राजधानी वीरेन्द्रनगर बस्दै आएका थिए ।

६३ वर्षीय अग्रवाललाई स्थानीय बजारमा ‘बालाजी’ उपनामले चिनिन्छ । उनले तल्लो बजारमा ‘शिव इम्पोरियम’ नामक कपडा पसल सञ्चालन गर्दै आएका छन् ।

जिल्ला प्रहरी कार्यालय सुर्खेतका सूचना अधिकारी प्रहरी नायव उपरीक्षक कवीन्द्रसिंह बोहराका अनुसार अग्रवालले कपडा पसललाई आवरणको रूपमा मात्र प्रयोग गरेका थिए । पसलको भित्री कोठाबाट उनले अवैध रूपमा भारतीय रुपैयाँ (भारु)को सटही गर्ने र सुनचाँदीका गरगहना धितो राखेर चर्को ब्याजमा सर्वसाधारणलाई नगद दिने (मिटरब्याजी) धन्दा चलाइरहेका थिए ।

अग्रवालले बैंकको झन्झटिलो कारोबारबाट बाहिर रहेका र पैसा छिटो लिएर आफ्नो कारोबार चलाउनुपर्ने बाध्यतामा रहेका स्थानीयलाई अवैध वित्तीय जालमा फसाउने गरेको प्रहरीको प्रारम्भिक अनुसन्धानले देखाएको छ ।

संयुक्त टोलीको ‘सरप्राइज रेड’

प्रदेश प्रहरी कार्यालय र जिल्ला प्रहरी कार्यालय सुर्खेतको संयुक्त विशेष टोलीले सोमबार दिउँसो ४ बजे उक्त पसलमा आकस्मिक छापा मारेको थियो । प्रहरी टोली पुग्दा पसलभित्र सोचेभन्दा ठूलो परिमाणमा अवैध सम्पत्ति फेला परेपछि सुरक्षाकर्मी समेत चकित परेका थिए ।

खानतलासीका क्रममा प्रहरीले पसलबाट सुन तथा चाँदीका गरगहना (बट्टा, पोका र डिब्बा) १८५ थान बरामद गरेको छ । त्यसको अनुमानित मूल्य तीन करोड रहेको प्रहरीले जनाएको छ ।

विभिन्न दरका भारतीय रुपैयाँ (भारु) आठ लाख ११ हजार ८००, विभिन्न दरका नेपाली रुपैयाँ दुई लाख १९ हजार ५००, नोट गन्ने इलेक्ट्रोनिक मेसिन एक थान प्रहरीले अग्रवालको कोठाबाट बरामद गरेको कर्णाली प्रदेश प्रहरी कार्यालयका सूचना अधिकारी रामप्रकाश शाहले जानकारी दिए ।

“बरामद भएको नगद रकम र गरगहनाको परिमाण हेर्दा यहाँ दैनिक लाखौँको अवैध कारोबार हुने गरेको पुष्टि हुन्छ,” उनले भने, “रकम गन्नका लागि पसलमा व्यावसायिक नोट गन्ने मेसिन नै राखिनुले यो धन्दा कति व्यवस्थित रूपमा चलिरहेको थियो भन्ने प्रष्ट पार्छ ।”

सूचना अधिकारी बोहराले बाह्रखरीसँग भने, “बरामद गरिएका गरगहना र नगदको कुनै वैध स्रोत खुल्न सकेको छैन । यति ठूलो परिमाणमा सम्पत्ति जम्मा गर्नु र नोट गन्ने मेसिन नै राखेर कारोबार गर्नु अवैध बैंकिङ कसूरको बलियो प्रमाण हो ।”

पक्राउ परेका अग्रवालमाथि सम्पत्तिशुद्धीकरण, बैंकिङ कसुर तथा अवैध मुद्रा विनिमय ऐन अन्तर्गत थप अनुसन्धान प्रक्रियाअगाडि बढाइएको छ ।

“हामी यसको जरोसम्म पुग्छौँ । यसमा अन्य को–को संलग्न छन् र यो नेटवर्क कहाँसम्म जोडिएको छ भन्नेबारे सुक्ष्म अनुसन्धान भइरहेको छ,” उनले भने ।

प्रहरीले बरामद गरेको तीन करोड बराबरको सुनचाँदीलाई आधिकारिक मूल्यांकनका लागि सुनचाँदी व्यवसायी महासंघ वा सम्बन्धित निकायमा पठाइने र वास्तविक तौल तथा मूल्य निक्यौल गरिने प्रहरीले बताएको छ ।

#कपडा पसल

#अवैध वित्तिय कारोबार